ഒരു പാതിരാമഴയില്‍
ചിറകടിച്ചെത്തി
നീയെന്റെ ചുണ്ടുകളില്‍ നിന്നു
ചുരത്തിയെടുത്ത പ്രണയം
കൂര്‍ത്ത തണുപ്പിലും
വിയര്‍ത്തു നനയുന്നു
ഏതു നിശബ്ദതയില്‍ നിന്നാണ്
വരുന്നതെന്നോ
മറ്റേതു മൗനത്തിലാണ്
അലിയുന്നതെന്നോ
പരസ്പരം തിരക്കിയതേയില്ല
നമുക്കടുത്തായി
ഒരു പുഴയുണ്ടായിരുന്നു
തീരം നിറയെ വെളുത്ത പൂക്കളും
വിരലുകളില്‍ സംഗീതവും
കണ്ണുകളില്‍ സാന്ത്വനവും
നെഞ്ചിടിപ്പില്‍
ഓര്‍മ്മകളുമുണ്ടായിരുന്നു
ആലിംഗനങ്ങള്‍
ഇടിമുഴക്കങ്ങളായി
ആകാശം നിറയെ
നമ്മളില്‍ നിന്നുതെറിച്ച
മിന്നല്‍പ്പിണരുകള്‍
ഒന്നിച്ചൊരു മഴയായി പെയ്ത്
ഒഴുകാന്‍ തുടങ്ങുമ്പോള്‍
നമ്മളെ കാത്തിരിപ്പുണ്ടായിരുന്നു
കര കവിഞ്ഞൊഴുകുന്ന പുഴ
കടലോളം പ്രണയവുമായി
